Hello 2017, helloooo my lovelies! 你地幾好嗎？聖誕同新年玩得開唔開心呢？我諗你地都應該過左一個好快樂嘅聖誕同新年。而我嘅聖誕同新年就簡直係幸福同快樂滿瀉。

聖誕party，大大少少嘅gathering都令我好忙好忙，不過响平安夜嗰日我都抽時間去左教堂望子夜彌撒。有時候有啲傳統好值得我地繼續傳落去，就好似我地要响特別嘅日子好好感謝响我地身邊出現嘅一啲可愛嘅人和事。

聖誕節嗰日我真係好開心，除左因為我收到聖誕禮物之外 （一陣我地會再講），都因為我去左上跳舞堂，等我終於可以燃燒一下我响節日裏面不停食嘢所吸收嘅 「幸福感」。我亦都睇左幾本好書refresh一下我嘅心靈。咁當然，面對住「唔知拆邊份禮物先」嘅煩惱 😛 都令我覺得自己好幸福快樂。

今年收到嘅聖誕禮物，大部份都係每個女仔都唔少得嘅護膚品同飾物。好得意地，聖誕節之後有一日，我約左我一班好閨蜜食飯，我地講起我地以往由男朋友所送嘅聖誕禮物當中，最鍾意嘅係邊一份禮物。當然，答案裏面唔少得名牌包包，bling bling鑽戒。而我最愛嘅聖誕禮物雖然都係一隻戒子，不過就係一隻有好特別意義嘅戒子。

我仲記得佢响平安夜嗰日送左一份聖誕禮物俾我，係一隻精緻嘅戒子，上面鑲左一粒剔透嘅寶石。粒寶石叫月光石，象徵住愛同守護。佢好細心咁幫我戴上隻戒子，佢將隻戒子套左响我尾指上面，然後同我鈎手指尾，向我許左一個小小承諾：「我會好好愛護你」。

隻戒子雖然未必係最名貴，但卻係最珍貴最令我懷念。每一次我戴上隻戒子，嗰個美麗時刻又好似再次重現，佢對我許下嘅小小承諾，佢嘅微笑，都令我覺得世上一切都好美好。縱然有啲愛未必能夠天長地久，但承諾卻可以係永遠。直到今日，佢仍然係我好好嘅朋友，佢依然用另一種愛守護住我。

雖然而家嘅我未有另一半，但我响新嘅一年會送一隻尾指戒子俾自己，作為送俾自己嘅一份禮物同一個承諾。我承諾我响2017年會堅毅自信，仍然會勇敢去愛。

响Entwine嘅pinky rings當中，我特別鍾意有一粒精緻心型鑽石嘅戒子。呢段時間我會好好愛護呢顆心，直至我命中註定嘅那個人出現，佢會將佢顆心交俾我，然後等我好好去愛。

假如你戀愛中，咁蝴蝶結嘅pinky ring會係一個好好嘅選擇。就好似Entwine logo一樣，蝴蝶結將兩顆心連繫住，代表住永恆雙向、真摯嘅愛。

18K玫瑰金鑽石戒指（重量：1.42g，鑽石6/0.040ct）           18K玫瑰金鑽石戒指（重量：1.87g，鑽石18/0.110ct）

我响呢度祝大家有個幸福嘅2017年，繼續做個時尚漂亮嘅可愛女生，繼續去愛身邊嘅人。

新年快樂！

Jewellery Girl

XoXo